Selektor opravdava Ronalda: “Strastven je, a stalno ga vuku i drame” (Video)

Selektor Portugala Roberto Martines ima opravdanje za isključenje svog kapitena Kristijana Ronalda.

Jedan od najboljih fudbalera svih vremena doživio je pomračenje svijesti usljed nemoći svoje reprezentacije u Dublinu pa je dobio direktan crveni karton zbog udaranja irskog fudbalera, a Irska je slavila 2:0, golovima Troya Parrotta u prvom poluvremenu.

“Glavni razlog zbog kojeg je Kristijano dobio crveni karton je njegova ogromna strast i frustracija kada ne pobjeđuje, a to želimo od svih igrača. Zatim, za centarfora je veoma teško u kaznenom prostoru kada ga štoperi stalno vuku. A onda, jedan trener (selektor Irske) pokušava da vrši pritisak na sudiju, štoper koji je veoma snažan pada na pod uz veliku dramu. Mislim da snimci izgledaju gore nego što je on zapravo uradio”, objasnio je Martines isključenje Ronalda.

Selektor Portugala dodatno je opravdao potez svoje zvijezde.

“Bilo je teško, brine za ekipu, mnogo puta je bio vučen i guran, a kada je pokušao da se odmakne od igrača, napravio je potez koji, po mom mišljenju, nije bio tako loš kao što kamere prikazuju. Jučer je njihov selektor rekao da Ronaldo pokušava da utiče na sudije, a onda njihov snažan štoper završava na zemlji u tolikoj drami… Sada želimo pobjedu u sljedećoj utakmici zbog Ronalda”.